بقلم شاعر التحدى : حمدى عفيفى منصور
شاعر ولكن شاعر وحروفي جوايا
شاعر وظروفي علم وراية
وضيوفي هواهم غير هوايا
شاعر وباأكتب من صبايا قصايد
باكتب فيها فكري وأرسم فيها شكلي
وأوصف فيها حُبي وأدعي فيها ربي
يرزقني الهداية كام وكام حكاية
من طفولتي من صبايا
وحلم بكرة وبعد بكرة والحساب والعصايا
وكتير حلمه كان سرايا
كان فيلمه باديء بالنهاية
كان عِشقه صادق م البداية
بدأت أكتب وأرفع وأنصب وأمسح وأشطب
والل يزعل والل يغضب
القلب ينجح والعقل يكسب
والنفس سهرت معايا
قلت لازم لازم أسالها الأسئلة ربنا حللها
والنفس بحس بِفَرحها بحس بألمها
سألت وردت بكلام كتير ووصتني
أسأل كبير إسأل ياصحبي غيرى ..
يمكن يضحك عليا ضميرى
ناديت لصاحب زميلي رأيك إيه في كلامى
في أبياتي في تعبيرى قولى ..
سمعنا ردك إسأل واحدغيري
أيوه إسأل واحد أد جدك وأوعي
تغضب و أنا ها أقول رأيى
وشيل إيدك من علي خدك
قصايدك من كل الأماكن الأبيات فيها الهم
ساكن فرحك قليل أملك بعيد كلامك
علي الوجيعية عايش في الطبيعة كلماتك
شوية سريعة ساعات تكون صعبة
ساعات تكون سهلة
حروفك حروف واصلة
وساعات حروف جاهلة
مين الآخر انت شاعر
ولكن شكرا يا صاحبى
عفوا يا سيدى مشيت مشيت
لما لقيت شجرة كبيرة جنب بيت
قاعد في ضلها راجل عجوز
راجل بسيط سلامُ عليكم يا جدى
سلام يا ولدى عايز إيه
لا أنا قدك ولا أنت قدى
أنا شاعر يا جدى أنا عارف يا ولدى
شِعرك سَد نفسى حُزنك ضر قلبى
إسمع يا حمدي في حلو وفي مُر
في بُخل وفي بِر في خير وفي شر
الدنيا فَر وكَر عارف طعم المُر ؟
غيرك عَايشه أمر وسُؤالك هايفيد مش هايضُر
فاهم يا ولدي فين اللى بتقوله يا ولدى؟
لازم تفيد وبكرة هاتستفيد
الأب ياأبنىأ اقرب من الجد والحفيد
وربك أقرب من حبل الوريد
كلامك لازم يكون جديد كتير
من شِعرك عَجبنى بس أوعى تبقى عنيد
زود شوية الأمل كفاية تعقيد
مش تعقيد والله يا جدى ..
بس مفيش جديد يا إبنى
إحنا غلط دا الفار مهما قرض مش هايقرض حديد
والنمل مهما غِلط عارف البلح من الجريد
إكتب ياإبنى عن أبوك وأمك هَمهم حُبك
وشيل همك الجنيه بقى أغلى منهم أنت
ولا همك الطمع عايش معاك عايش ف دمك
إكتب عن الأخ وغلاوته إكتب عن الأخ وقساوته
عن الأرض وترابها عن البلد وأحبابها
عن الأيام عن الأحزان الأحزان إللي واقفه علي بابها
إكتب عن الوطن والل نابه ورجاله وشبابه
والدم الل روي رماله وترابه والل بيسعي لخرابه
والل سافر وسابه إكتب عن الأم
وقلي مين سامع سؤالها مين قابل عتابها
قولى مين السبب ف ألمها وف عذابها
إكتب وخليك حكيم إكتب وصحح المعنى
إكتب وقول وسمعنا إكتب كلمة وطن
إكتب سلامتك يابدن حمي وإسمها الفتن
إكتب وسمعنا مصر بتجمعنا
إدعى علي الخاين باللعنة
الخاين اللى هدفه يضيعنا عامل شارينا
والحقيقة هو بايعنا يا رب انت عالم بأوجعنا
عالم بصلة الرحم إتقطعت وإتقطعنا إكتب يا شاعر —
أنت يا جدى اللى شاعر نصايحك ف رقبتى دَين
ياأبنى زمان كان نفسى أكون شاعر ..
بس قولت هاأعيش حزين
سيبني ياأبني أكمل كلامي
إكتب وإخرج كل الل جواك
إكتب عن العلم عن العمل حسسنا بالأمل
إكتب كفاية دموع يا عين
إكتب عن بيوتنا عن قلوبنا عن جيوبنا عن عيوبنا
عن الل بتعاير الأم بخِلفة بناتها
إكتب وأقول يا أم البنون .عليكى ديون .
مين يقدر سددها؟ البنت ربك خَلقها إتقِ الله —
النار محدش عارف حدودها إكتب عن البيوت
اللى إتحرق عقودها والرجال اللى إتنكر جهودها
ناس بتتشكر رغم بُخلها وناس بتتحرم من كرمها
وجودها ناس منظر ليها قميتها وعمرها ما وفت بعهودها
إكتب عن الضعفا الى إتثبت وجودها
وعن الفقر الى سكن البيوت وجددها
الغابة لو غاب فيها الأسد مين يقدر ع قرودها
تشتري بقرش بلح وتقول ليا في البلد نخل
وغيرك لو وفر وفِرح يقولوا دا بُخل
إكتب عن الظلم وأوعى تظلم وأوعى تفضح
يا بختك لو قصايدك خلت شكلنا يفرح
إكتب عن البَركة واللى بيحمد ويشكر
هو مين حاسس بالبلد ومين بيهتف ؟
ومين إعتصم وكان بيحلف؟
رُد قولى عايزين نصوم عايزين نصلى
إحفظ يا رب مصر وإقبل دعوتي ف ساعة
تَجليِ دعوة من قلبنا وأخر وصية ويشهد عليا ربنا
إكتب وإحترم كلامك إكتب وقول يا مصرى
فُوق فوق لو عايز للنجاح تدوق دا الحق دايما فوق
والله يا جدى أنا شاعر علي قدى إيدى علي خدى
وبا أقول لنفسى إتكلمى رُدى أنا لو شاعر يبقى
عشان أنا عرفتك يا جدى بشكر ربى
اللى جعلك سبب ف راحة قلبى
ربنا يبارك ف عمرك وأنا وأبويا وإبنى
تحت أمرك سلام ياأبنى باأدعيلك دعوة قبل نهايتى
ربنا يوضع السر في قلمك وكلامك يبقى
حُر مهما الكلام ألمك
يبارك ربنا ف ولدك يبارك ربنا ف عملك
والحق دايما يبقى رايتك وعلمك