سيظل جيش الكنانه ينتصر
بقلم / حماده علام
تحليلات بمنظور مختلف
الواحد ساعات كتير بيتسائل عن جدوى اللي بكتبه ده
ولكن هذه المره بالذات حسيت انه حق أي حد من اللي بيموتوا واللي بيدوا الأوامر اللي ممكن تنتهي بموت حد ويضطر يعيش بالذنب..
وهذا توضيح لبعض النقاط البسيطه
أولا في معظم الكوكب, كونك إنك ترمي تهم جزافية زي إنك تقول إن القادة بتقصد ترمي الجنود والضباط الصغيرين في حضن الموت, ديه جريمة جنائية.
في دول تانية جريمة مدنية تستحق أن يترفع عليك قضية تبيعك اللي وراك واللي قدامك.
حتى في الدول اللي فيها الحرية مطلقه وجزء من الدستور زي أ مريكا, لو قلت جمل زي اللي فوق ولا زي “الجيش الامريكي فاشل” (مع انه عمليا مكسبش أي حرب دخلها تقريبا من ساعة الحرب العالمية التانية وبيتصرف عليه فوق ال 600 مليار دولار في السنة), الشعب ممكن ياكلك بسنانه.
يعني ممكن تنتقد قرارات أمريكا بالدخل في حرب ولا إنها تروح دولة زي ما أنت عايز, بس تقول على الجيش انه معدوم الكفاءة؟! الشعب حقيقي يقطعك بسنانه!!
في أي دولة محترمه مفيش حاجة اسمها “أنا مواطن بدفع ضرائب ومن حقي اعرف تفاصيل العمليات العسكرية وليه فلان مات ولا ليه العملية الفلانية باظت”, لو طلبت ده ماحدش هيعبرك أصلا وهايعتبروك معتوه!
اللي بيعمل كده اللجان الداخلية في وزارة الدفاع ومعاهم لجنة الأمن القومي في البرلمان, يعني مش حتى البرلمان كله!
فيه حاجة اسمها security clearance لازم تاخدها علشان يتسمح ليك إنك أصلا تعرف عناوين أي معلومة ومش أي حد بياخدها وليها درجات وفيه حاجات زي ال black ops حتى بتوع البرلمان ميعرفوش عنها أي حاجة!
اللي فوق ده وده, إن الدول ديه مفيش فيها الفتي اللي عمال على بطال ده. ليه؟! علشان الشعوب هناك عارفة امتى تتكلم وامتي تسكت. المواطن هناك بيبقي عارف انه علشان يجود برأيه اللي ملوش أي تلاتين لازمة, لازم يكون الاتي:
1- راجل دارس كويس جدا في العلوم العسكرية. فاهم يعني ايه عملية عسكريه, يعني ايه فرقة, يعني ايه كتيبة, يعني ايه اقتحام وإزاي وليه وامتي, الخ.
2- تكون عنده معلومات من على الأرض بخصوص العملية المعينة بالذات (طبيعة الأرض الجغرافية, طبيعه العدو, نوع السلاح اللي ممكن يستخدم هناك, حجم القوات اللي هناك ونوع التحصينات اللي ممكن تتعمل, الخ) أو يكون على علم بعملية مشابهة لدولة تانية تحت نفس الظروف بالضبط بس الدولة التانية قدمت كفاءة أعلى من دولته.
بس لما ده يحصل, ممكن المواطن أو الصحفي أو المذيع تلاقيه بينتقد عن علم.
علشان كده مثلا يوم ما الإرهابيين نيموا باريس كلها, مسمعناش عن السوشيال ميديا مقلوبة على الشرطة والقوات الخاصة الفرنسية إنها فاشلة و “إزاي كام نفر يعملوا ده كله!!”
لما القوات الامريكية كانت متبهدلة في أفغانستان والعراق, كان الشعب بينتقد الرئيس على قرار الحرب, و كل يوم يتشتم في الأخبار, بس مفيش كلب واحد استجري يقول إن الجيش الأمريكي فاشل ومش عارف يحمي جنوده!
إشمعنا احنا عندنا الهبل ده حقيقي؟!
هيجي واحد أنا عارفه وعارف غباءه هيقول الجملة الجبارة بتاعة: “بس الموضوع مش محتاج علم! كل شوية ناس تموت ده أكيد معناه فشل”
هرد عليه بإيه الشخص ده؟!
تعالى معايا كده نتخيل مستشفي قلب عالمي للأطفال كبيرة جدا وعرفت معلومة إن بيموت فيها 1200 طفل في السنة في العمليات.
يعني بمعدل 100 طفل في الشهر
بالقياس بتاعك كشخص غبي, هتقول إن ده معناه إن المستشفي ديه أكيد الأطباء فيها في منتهي الفشل وأكيد فيها إهمال رهيب!
الإنسان العاقل بقى هيعمل ايه؟!
هيسأل سؤال بسيط واحد: “هى المستشفى دي بتعمل كام عملية في السنة؟”
هيرد عليه المسؤول ويقوله “بتعمل 100 ألف عملية”
ده معناه ايه؟! إن نسبة النجاح في المستشفى ديه تكاد تقترب من 99% !!!
متخيل إن معلومة واحدة ليها علاقة بعدد العمليات قلبت الموازين من إن المستشفى ديه هي قمه الفشل والإهمال وتحولت إنها صرح عالمي بيعمل نسبة نجاح تقترب للاعجاز؟!
مجرد معلومة واحدة قلبت الموازين 180 درجة!
فما بالك بقي لو فيه بدل المعلومة 20 ولا 50 ولا 100 ولا 1000؟!
أنت شايف إن مثلا اتعمل عمليات على كمائن في 2019 في 3 ولا 4 كمائن.
طب من ضمن كام؟!
كام عملية تم إحباطها في مرحلة التخطيط؟!
كام عملية تم حباطها في مرحلة التمويل؟!
كام عملية تم إحباطها في مرحلة التدريب؟!
كام عملية تم إحباطها في مرحلة التنفيذ أو ما قبل التنفيذ؟!
عند سيادتك أي معلومة من دول؟!
أُمّال بتهرتل فى اللى متعرفوش ليه ؟!
أصل حقيقي مينفعش تكون ابن حلال وبتعمل القرف ده!
ولا مش من حقك خالص تعرف عدد العمليات اللي فوق ديه علشان ديه تفاصيل عسكرية مش إنتاج فرن عيش بلدي !
كفاية قرف بقى !!!
بمجرد حدوث أى عمليه إرهابيه و يروح فيها أبطال أو حتى يصابوا …
ومش عايز أصدمك و أقولك إن حتى لو تم إحباط العمليه و بدون خسائر نفوجئ بناس برده مش قادرين يتخلوا عن عقدة المحلل السياسى والعسكرى و يقولك فيه ثغره أمنيه كبيره فى العريش والتانى يدخل يقولك كده يبقى فيه حاجه غلط والثالث يقول الكماين مش متأمنه ولا فيها سلاح و ذخيره كفايه …. الخ .
أبوس دماغ أبوكم وأمكم و كل عيلتكم بلاش فتاوى تافهه بدون أى معلومه حتى مؤكده فى دماغك ..
عارف يعنى إيه تقول إن فيه ثغره أمنيه يا أذكى إخواتك ؟
إنت كده أولا دعمت العمليات الإرهابيه و أكدت للى بيتابعوا تحليل معاليك إن إختيارهم كان صح و يبدؤوا يراجعوا خططهم تانى و يكرروها تانى لمجرد إن حضرتك قلت إن فيه ثغره أمنيه وخاصة فى العريش لانهم شافوا فى تعليقك وتحليلك خوف وقلق و تأكيد على تقصير أمنى وإستخباراتى .
والباشا اللى بيقول كده فيه حاجه غلط!!
أحب اقولك إن الغلط الوحيد فى اللى حصل هو فى دماغك لأنك لو مكان رجالتنا هتعرف ان مفيش غلطه غير إنك بتتعامل مع عدو شبحى غير معلوم هويته ولا إتجاهاته ولا أهدافه اللى عايز يهاجمها لأنه فجاءه بتلاقيه قدامك بسيل من النيران و أسلحه تقيله بتتقذف عليك .
والثالث اللى شايف ان الأكمنه مش متأمنه ولا فيها سلاح ولا ذخيره فده ميتردش عليه أصلا لأنه لو كان استخدم فردة الجزمه اللى فى دماغه كان عرف انه صد 3 هجمات على 3 كمائن فى وقت واحد متمش بالشوكه والسكينه ولا حدف طوب فى حين المهاجمين كانوا بأسلحه تقيله وأحزمه ناسفه .
ياريت كل واحد عاوز يقول معلومه يحتفظ بيها لنفسه..
هو لازم البدع تبقى من عندنا…!!!!
الثبات الثبات يا اهل مصر فنحن ع الحق المبين رحم الله شهدائنا الأبرار?
حفظ الله مصر
حفظ الله الجيش
معركة وعي
لتحيا مصر بلادي