د. / سومه تاج الدين
صباح الفل على كل متابعيني الأعزاء
كل عام وحضراتكم جميعا بخير وصحة وسلامة يارب بمناسبة اقتراب شهر كلنا بننتظر قدومه من السنة للسنة بكل لهفه وشوق وحب مهما كبرنا ريحته بتحمل معها أجمل ذكريات عشناها سواء في الطفولة البريئة أو الشباب بكل عنفوانه وأحلامه وتطلعاته
كلنا متوقعين ان رمضان السنه دي غير أي رمضان فات
كلنا عارفين ان رمضان شهر للعباده مش للأكل والشرب والتفاخر بالعزومات
السنه دي الوضع مختلف تماما.. رجاء من كل زوجه عاوزه تحافظ على بيتها بلاش تحملي زوجك أكتر من طاقته.. الدنيا لوحدها بقت مفرمه
بلاش تحسسيه بعجزه أمام متطلبات الحياه من دروس ولبس وأكل وشرب وكشف وعلاج واهتمام ورعاية
بلاش تتخانقوا على حاجات َممكن تعيشوا من غيرها وتعدوا وتفوتوا لبعض علشان الدنيا تمشي
قبل كدا أيام كورونا كنت باسمع من سيدات انها سابت البيت علشان مش بيجيب بامبرز للطفل وكانت لسه الأسعار مش مبالغ فيها زي دلوقت.. اومال الغساله إللي عندك دي لازمتها إيه؟؟!!!!
إللي تقدري توفريه وفريه متستخسريهوش
وإللي تقدري تساعدي بيه مش عيب
َمتبصيش لجارتك أو زميلتك في الشغل أو أختك أو قريبتك أنت مش عارفه ربنا أخد منها إيه او هي عايشه مبسوطه في حياتها ولا لأ…. ورا كل باب مقفول حكايات لو عرفتيها هتبوسي إيدك على النعمه إللي انت فيها
خلينا نهدي حبه ونخلي الدنيا تمشي
اللي يجيبه اعمليه وانت راضيه واحمدي ربنا ان عندك حد شايل همك
خليكوا مسنودين على بعض
وحضرتك… أيوه انت… أيها الزوج المحترم… متنساش إنها بتتعب علشانك وبتربي ولادك يا ريت تعاملها بما يرضي الله وتحسسها ان لها قيمة في حياتك بلاش معاملة الخادمة إللي المفروض تعمل كل حاجة من غير متتعب ولا تشتكي ولا تتعامل كويس
متنساش تفتكرها في نص اليوم بمكالمة تليفون تهون عليها تعبها وتفرحها وتحسسها انك فاكرها
وحضرتك كمان .. أيوه الزوجه الجميله.. بلاش لما يتصل عليكي تقولي له عاوزه وعاوزه وعاوزه تخليه يكره الساعة إللي فكر يكلمك فيها
افتكروا لبعض الحلو إللي بينكم علشان تعدي والمركب تمشي
الدنيا معدتش مستاهلة مناهده وفرهده على اتفه الأمور
إحنا في زمن صعب فبلاش تصعبوها على بعض .
دمتم بخير