اجري يا ابن آدم جري الوحوش غير رزقك لن تحوش

بقلم – محمد بركات

فيلم “جري الوحوش” من أهم الأفلام اللي كتبها الكاتب العبقري محمود أبو زيد، واللي قدر من خلاله يقدّم صورة حقيقية للحياة على إنها اختبار كبير لكل إنسان. 

الفكرة الأساسية في الفيلم إن مفيش حد كامل، وكل واحد عنده نعمة ناقصه ودايمًا الإنسان بيبص للي مش معاه أكتر ما بيبص للي ربنا رزقه بيه.

فمحمود عبد العزيز كان عنده الصحة والقوة، لكن كان نفسه يبقى غني ويخرج من الفقر.

 ونور الشريف كان عنده الفلوس وكل حاجة تقريبًا، لكن كان محروم من نعمة الإنجاب، وده كان مخليه حاسس إن الفلوس لوحدها مش كفاية. أما حسين فهمي فكان راجل متعلم وعنده مكانة علمية كبيرة، لكنه كان عايز فلوس أكتر وشهرة أكبر، ففضل يجري ورا طموحه من غير ما يكتفي باللي وصل له.

وهنا تظهر عبقرية محمود أبو زيد، لأنه ورّانا إن كل شخصية كانت بتتمنى الحاجة اللي عند غيرها، ومحدش كان راضي تمام الرضا عن حياته. وكأن الفيلم بيقول إن الإنسان بطبعه ساعات بينسى النعم اللي في إيده، ويقعد يفكر بس في الحاجات اللي ناقصاه.

وعشان كده كانت رسالة الفيلم عميقة جدًا: السعادة مش إن الإنسان يبقى عنده كل حاجة.

ده مستحيل…عشان الكلام ده ف الجنة بس ..

لكن السعادة الحقيقية في الرضا والقناعة، وإن الواحد يشكر ربنا على نعمه وما يخليش الطمع يعميه عن الخير اللي بين إيديه. فالحياة في النهاية اختبار كبير، والنجاح الحقيقي فيها إن الإنسان يعرف قيمة اللي معاه قبل ما يضيعه وهو بيجري ورا اللي مش معاه.