تعالي اقولك الحكاية…

بقلم / محمد سعيد

تعالي اقولك الحكاية بالعامية وخلينا نكلم مع بعض بصوت عالي علشان مصلحتنا كلنا. 

🔴 هو ليه ترامب مضربش إيران؟ ليه جاب ورا وأجل الضربة شوية؟ وأيه اللي اتغير في الشرق الأوسط الكام ساعة اللي فاتوا؟! خليني أحكيلك شوية تفاصيل مهمة جدًا وممكن تكون غابت عنك… 👇

من كام يوم، كنا حكينا مع بعض في كذا بوست إن كل المؤشرات كانت بتقول إن في ضربة أمريكية شاملة جاية على إيران… والموضوع مكانش مجرد تهديد إعلامي ولا تسخين جمهور… ده كان في تحركات حقيقية على الأرض وفي الجو والبحر…

🟢 طيارات وقاذفات أمريكية متوجهة للشرق الأوسط، وحاملات طائرات في الطريق، وطائرات تزود بالوقود… إخلاء للسفارات والرعايا وحتى القواعد الأمريكية في المنطقة… حتى إيران نفسها قفلت مجالها الجوي وكانت مستعدة لمعركة هتشعل فتيل الفوضى في الشرق الأوسط كله…

بس فجأة السيناريو ده اتكسر!

🟣 فجأة، ترامب لغى قرار الحرب في آخر لحظة، والطيارات الأمريكية رجعت تاني، والمجال الجوي الإيراني رجع اتفتح، والتصعيدات الرهيبة اللي كانت بتحصل في كل دقيقة رجعت تاني تهدى نسبيًا…

بس السؤال هنا؛ ليه؟! إشمعنى فجأة ترامب غير رأيه؟! هل عشان “إيران وقفت قتل المتظاهرين” زي ما كان بيقول قدام الناس، ولا في سبب تاني؟!

🔵 الحقيقة يا أصدقائي إن في سبب تاني… ومش سبب واحد بس، دي عدة أسباب… والأسباب دي كلها بتقولك إن أمريكا بتخسر نفوذها في العالم كله وبتتراجع بشكل أنت مش واخد بالك منه ولا متوقعه، وإن أخيرًا سمعة علم النجوم اللامعة بقت مش قد كده…

إزاي؟!

🟡 شوف… عشان تبقى فاهم، فخليني أقولك ان خطة الحرب على إيران مكانتش مجرد خطة حرب شاملة…

الخطة يا أصدقائي (واللي كشفت عنها تقارير استخباراتية نشرتها مواقع غربية وعبرية) كانت أكبر وأخطر من كده بكتير… اللي كان متخططله هو إن أمريكا واسرائيل يشتغلوا على تنفيذ ثورة أو إنقلاب على نظام الحكم من جوه باستعمال جواسيسهم، وده بالتالي يؤدي إلى فوضى منظمة يتم استغلالها في ضرب مؤسسات الدولة نفسها…

🟠 وبكده هتكون النتيجة شلل اقتصادي وخدمي يؤدي لإسقاط نظام الحكم كله، وييجي معاه بديل جاهز بيتقدّم، اللي هو “رضا بهلوي” إبن شاه إيران السابق، بدعم من أمريكا وإسرائيل…

الراجل ده كان ناوي ييجي ويسلم البلد للأمريكان والصهاينة حرفيًا، وقال بنفسه في تصريحات إعلامية إنه هيفكك البرنامج النووي كله وهيعترف بإسرائيل وهيبقى حليف ليها في المنطقة، وهيحرر البلد من حكم المرشد!

🔹️ بس اللي حصل بقى كان شيء غير متوقع…

فجأة؛ الصين اتدخلت من باب محدش شايفه… وقدرت من خلال قدراتها التقنية إنها تعطل تقنيات الرصد والاتصال، وساعدت إيران، بالتعاون مع روسيا، في تعطيل شبكة ستارلينك اللي فتحها “إيلون ماسك” جوه البلد بعد وقف خدمات الإنترنت… وبكده، فاللي حصل كان عمى استخباراتي شامل خلى الشبكات العميلة اللي كانت بتشتغل جوه البلد تبدأ تتكشف ويتم اعتقالها…

🟢 واللي حصل بعد كده إن الإيرانيين العاديين نفسهم (برغم غضبهم من الوضع وسخطهم على النظام وعلى سوء أحوال المعيشة) فهموا إن اللي بيحصل مش ثورة للإصلاح زي ما هما كانوا عايزين، وإن في جهات بتستغل غضبهم عشان تخلق فوضى مصممة لإسقاط بلدهم كلها وتقسيمها… وكان رد فعل كتير منهم إنهم وقفوا فجأة في صف الدولة برغم كل خلافاتهم معاها… مش حُبًا في النظام، لكن رفضًا لإعادة انتاج نظام الشاه مرة تانية…

ومن أول هنا بقى، الحسابات اتغيرت…

🟣 ترامب بعد ما كان متصور ورجالته مفهمينه إنها هتبقى ضربة سريعة زي فنزويلا، بقى مشروع حرب مفتوحة جديدة هتكون أعنف بمراحل من العراق وأفغانستان… وبقى في احتمالية كبرى لحدوث رد فعل إيراني واسع ومدمر، هيحط القواعد الأمريكية في الخليج كلها تحت النار، ده غير مضيق هرمز اللي هيتقفل، وأسعار النفط اللي هتولع والأسواق العالمية اللي هتدخل في صدمة لا تحتمل!

🔸️ وفوق كل ده، ترامب كان هيضطر للتعامل مع كل التبعيات دي من غير غطاء إقليمي…

إزاي؟!

🟡 عشان دول الخليج رفضت فتح أجواءها لاستهداف أو قصف إيران… والسعودية وعمان وقطر وتركيا ومصر كلهم اتواصلوا مع الإدارة الأمريكية وقالولهم إن الضربة الأمريكية دي هتؤذي مصالح أمريكا نفسها وهتؤذي مصالح المنطقة كمان…

ده غير كمان الدعم الروسي والصيني اللي اتوفر لإيران في الخلفية، بعد تقارير (غير مؤكدة طبعًا ومستحيل تتأكد بشكل كامل حاليًا) اتكلمت عن إن إيران استلمت وسائل دفاع جوي من نوع S-400 المتطور من روسيا، وإن الصين كمان دعمتها بأنظمة دفاع وحرب إلكترونية…

🔵 وفي كمان كلام قرأته على وسائل الاستخبارات مفتوحة المصدر على X، بيقول إن إيران معاها قدرات صاروخية فرط صوتية كانت هتدمر المنشآت والقواعد الأمريكية وحتى حاملات الطائرات والمدمرات الأمريكية في البحر…

وإن كمان كان في تحذيرات للإدارة الأمريكية بإن مفيش كثافة أصول كافية في المنطقة عشان تقدر تستحمل رد الفعل الإيراني، وإن ثمن الضربة هيكون مكلف جدًا إقليميًا وممكن يؤذي أو يدمر وجود أمريكا الاستراتيجي في المنطقة!

🔸️ ومن هنا بقى ترامب سأل نفسه سؤال بسيط… هل المكسب يستاهل الثمن اللي هندفعه؟

🟣 والإجابة:  المرة دي كانت لأ… برغم كل الضغط الإسرائيلي ودفعهم للتصعيد مع إيران عشان كانوا وما زالوا شايفين إن الحرب الشاملة الإقليمية هتخدم مصالحهم وتطلعاتهم للتوسع وإقامة “إسرائيل الكبرى” حتى لو دفعوا مقابل ده ثمن بشري داخلي… ترامب لغى القرار وأجل الضربة شوية، لحد ما يقدر يشوف ازاي ينفذها بدون ما يتكبد خسائر فادحة!

⚫️ وهنا مهم أوي تعرف وتبقى فاهم إن القرار ده مش لأنه خايف، ولا لأنه طيب، ولا عشان هو خلاص صرف نظر عن الفكرة… لأ…

السبب هو إنه فهم إن إيران مش سهل تنكسر بالضربة اللي هو كان مخططلها، وإن أي استعراض قوة أمريكي المرة دي ممكن يتحول لمستنقع طويل هيغرز فيه ومش هيعرف يطلع!

🟢 ولاحظ إن هو أصلًا معزول دلوقتي وعلاقاته الدبلوماسية وتحالفاته مش أحسن حاجة خالص… ده غير إن عنده خلافات (كبيرة جدًا) مع الناتو بسبب جرينلاند اللي عايز يحتلها، لدرجة إن دول أوروبا بتبعت قوات للجزيرة دلوقتي عشان تدفاع عنها ضد الغزو الأمريكي! ده موضوع كبير أوي لوحده لازم نحكي عنه في بوست منفصل

فاللي حصل في النهاية هو إن الضربة اتلغت في آخر لحظة والطيارات رجعت والمجال الجوي اتفتح، والتصعيد الإعلامي هدي شوية، واتقال إن في فرصة دبلوماسية، بس الحقيقة إن دي مجرد إعادة تموضع ودراسة للموقف الاستراتيجي… مش نهاية القصة…

🔵 ترامب يا أصدقائي ما انسحبش، هو بس بدّل الأدوات، من قصف بالطيران والصواريخ لضغط سياسي واقتصادي ومناقشات ومفاوضات… لإن المواجهة دلوقتي خلاص مبقتش مع إيران بس… دي إيران ومن وراها روسيا والصين… والثمن دلوقتي وبالشكل الحالي للموقف اللي احنا فيه على الأرض، هيكون أعلى بكتير من أي مكسب ممكن ياخده…

🟠🟣🟢 طب أيه المتوقع في اللي جاي؟!

آخر أخبار بيتم تداولها حاليًا هي إن الضربة لم يتم إلغاءها، وإنما تم تأجيلها… وحاليًا ما زالت في تجهيزات لتصعيدات قادمة في الشرق الأوسط بخصوص إيران، لكن غالبًا مش هتكون دلوقتي، وهتحصل يا إما في آخر شهر يناير أو في شهر مارس… وأدينا هنشوف الوضع ساعتها هيكون اتغير ولا لسه زي ما هو…