التفوق التكتكي الباكستاني.لمصلحه الصين

كتب تامر ياسين 

🔴 الهند دلوقتي بتمر بصدمة عسكرية غير متوقعة، بعد ما تكبدت بعض من أسوأ الخسائر الجوية في تاريخها… 

والسبب؟ باكستان لأول مرة استخدمت طيارات حربية ووسائل دفاع جوي صينية في أول معركة جوية بينها وبين الهند… والنتيجة كانت نجاحها في اسقاط 5 طيارات اشترتها الهند من الغرب ومن روسيا، وتعتبر من ضمن أغلى وأقوى الطيارات في العالم!

⚫️ الضربة دي يا صديقي أذت سمعة التكنولوجيا العسكرية الغربية بالكامل، ورفعت راية السلاح الصيني في العالم كله، ووقعت أسهم شركات الدفاع الغربية.. ومش بس كده.. دي كمان قلبت موازين التفوق العسكري والجوي في الشرق الأوسط كله، وتحديدًا ما بين مصر وإسرائيل!

طب إيه اللي حصل بالضبط، وازاي الحرب بين الهند وباكستان رفعت أسهم شركات الدفاع الصينية، وازاي اللي حصل خوف اسرائيل نفسها؟!

🔵 هات كوباية شايك ونعناعك، وتعالى معايا أحكيلك اللي حصل خطوة بخطوة وهتفهم كل حاجة…

🔴 شوف يا سيدي…

النهارده الصبح وتحديدًا الساعة 1 الفجر، الهند أطلقت عملية عسكرية جوية ضخمة اسمها “سِندور”، استهدفت بيها معسكرات قالت إنها بتضم إرهابيين جوه باكستان.. وفي خلال دقايق، طلعت الطيارات الحربية الهندية وقصفت مواقع في كشمير وجوه باكستان نفسها بجوار “مظفر آباد”، باستخدام طيارات الرافال الفرنسية وسوخوي وميج الروسية، ودرونات هيرون الإسرائيلية..

الهجوم كان سريع، عنيف، واستخدموا فيه صواريخ SCALP الأوروبية وقنابل دقيقة التوجيه… وبالفعل نجحوا في قصف بعض المواقع، ونتج عن ده سقوط حوالي 26 ضحية في باكستان، منهم طفلة عندها 3 سنين، ده غير جرح 46 آخرين، حسب آخر الإحصائيات من وكالة CNN…

🟢 بس المفاجأة بقى واللي الهند مكانتش متوقعاه؟ إن ولا طيارة من الطيارات اللي قامت بعملية القصف دي، رجعت تاني!

باكستان أعلنت بعدها بشوية إنها نجحت في إسقاط 3 طيارات رافال، وطيارة ميج-29، وطيارة تانية سوخوي-30، وكمان طيارة مسيرة من نوع هيرون الإسرائيلية… وعايز أقولك ان كلهم طيارات من أقوى وأغلى الطيارات اللي عند الهند، واللي كانت بتعتمد عليهم كركيزة أساسية في تفوقها الجوي!

🟡 وبالمناسبة عشان تبقى فاهم، ف دي أول مرة في التاريخ طيارات “رافال” تسقط في مواجهة مباشرة.. وطبعا السبب مش انها وحشة، بل العيب أكيد في الطيار الهندي اللي بيسوقها نفسه، واللي تسبب في فضيحة للصانع الفرنسي!

والمفاجأة الأكبر؟ إن السلاح الباكستاني اللي أسقطهم مش طيارات F-16 الأمريكية، ولا بطاريات دفاع جوي روسي… لأ، ده سلاح صيني 100%!

1️⃣ باكستان استخدمت منظومات دفاع صيني متطورة زي HQ-9B وHQ-16 و LY-80

2️⃣ واستخدمت كمان طيارات صينية متطورة من نوع J-10C وJF-17 Thunder ، من تصنيع شركة Chengdu Aircraft العسكرية الصينية!

🟠 والمذهل أكتر؟!

مفيش ولا طيارة صينية وقعت من باكستان.. ومخسرتش ولا بطارية من بطاريات الدفاع الجوي الصينية بتاعتها!

🟣 وأول ما الأخبار دي وصلت للإعلام بقى، حصل زلزال وعاصفة في أسواق الأسهم الغربية والصينية محدش كان متوقعها…

في خلال ساعات قليلة، أسهم شركة Dassault Aviation الفرنسية، اللي بتنتج طيارات الرافال، نزلت بنسبة 1.6% في نفس اليوم في بورصة باريس… والمستثمرين بدأوا يشككوا في كفاءة الطيارة اللي كانوا بيعتبروها “مفخرة أوروبا”، وأقوى مقاتلة جيل رابع في العالم…

وفي المقابل، شركة Chengdu Aircraft الصينية اللي بتصنع طيارات الـ J-10C، أسهمها طارت لفوق بنسبة 18% في يوم واحد بس! وده أعلى معدل صعود ليها من شهور!

🔵 وبحسب تقارير من Bloomberg وNikkei هتلاقيها في الكومنتات 👇 اللي حصل ده خلّى العالم يبص للصين بشكل مختلف… مش بس كمصنع سلاح، لكن كدولة بقت بتصدر منظومات قتالية قادرة تنافس، بل وتتفوّق، على طيارات الجيل الرابع الغربية اللي كانت راعبة العالم كله، وكل الدول بتشتريها عشان مفيش غيرها ينفع يتسلحوا بيه.. وبسبب ده بيضطروا يرضخوا لشروط الغرب وأمريكا المجحفة!

يعني باختصار: المعركة قامت بين الهند وباكستان.. بس الرابح الأكبر كان الصين!

🟠 طب هو إيه علاقة مصر بكل ده؟!

🔴 المفاجأة الصادمة يا صديقي، هي إن نفس منظومات الدفاع الجوي الصينية دي موجودة في الجيش المصري بالفعل!

آه والله… منظومات HQ-16 وLY-80 موجودين بقالهم فترة ضمن الدفاعات الجوية المصرية، بعد ما مصر اشترتهم رسميًا من الصين من قريب هما ومقاتلات صينية بردو من نفس الأنواع اللي عند باكستان!

وعايزك انت تتخيل معايا ان مقاتلات الـ JF-17 الصينية اللي تمنها 20 أو 25 مليون دولار دي، أثبتت قدام العالم كله دلوقتي انها قادرة تعمل اللي ماقدرتش عليه طيارات بتمن 100 مليون، وكمان تتفوق عليها وتهزمها في معارك جوية مباشرة!

⚫️ الموضوع ده عامل قلبان في الميديا الإسرائيلية والغربية من امبارح، والأمر وصل لإن إسرائيل بنفسها اشتكت للصين، وقالت إن تصدير الأنظمة دي لمصر بيمثّل “تهديد مباشر لتفوقها الجوي”… وده يعتبر اعتراف رسمي بخوفها من أنظمة الدفاع الجوي المصري الحالية!

يعني اللي حصل ده مش مجرد تفوق تكتيكي بسيط من باكستان… ده لحظة فارقة خلت الصين تقف على قمة سوق السلاح العالمي، وتعيد تشكيل موازين القوى في الشرق الأوسط!

🔵 والأهم من ده كمان ان الصين من كام يوم عملت مناورات عسكرية وجوية رسمية مع مصر، ولأول مرة في التاريخ ظهرت فيها مقاتلات صينية بتتحرك وتناور فوق الأهرامات المصرية! المناورة دي اسمها كان “نسور الحضارة 2025″، وتقدر تدور عليها بنفسك وتشوف صورها، وهتلاقيني سايبلك مصادر ليها في الكومنتات تحت..

🟢 فهل دخول الصين في معادلة الشرق الأوسط هيخلينا نشوف توازن وردع من نوع جديد ضد اسرائيل وأمريكا وحلفاؤهم الغربيين؟ 

هو ده السؤال اللي إجابته هتحدد مستقبل المنطقة كلها