بقلمي / اسماعيل شتا شمس
عمك محفوظ مربى خروف صحى لقى الخروف ساخن وبيتألم
احضر اليه الدكتور البيطرى حتى يعرف سبب الألم والسخونيه…
تفاجأ من قول الدكتور أن الخروف مصاب بالكورونا
بص عمك محفوظ للخروف وقعد يكلمه بإستغراب وتعجب وألم وحرقه دم ….
جالك كورونا من أيه؟
خريج هندسه و مش ﻻقي شغل؟
خريج تجاره إنجليزى و واقف فى سوق الخضار؟
خريج أداب و بتسوق تاكسى؟
خريج حقوق و بتشتغل سمسار؟
خريج زراعه و جالك تعيين فى الطرق و الكبارى؟
جمعت كل اللى تملكه و أعطيته لإبنك لكى يسافر إيطاليا ومات هناك بالكورونا؟
مديون و مش عارف تسدد ديونك؟
بتستنى دورك فى التعيين بقالك 20 سنه؟
حبيبتك عايزه تتجوز و مش قادر تخطبها ؟
رحت ترخص المرسيدس و لقيت عليها مخالفات رغم إنك عندك عربيه كارو ؟
مش قادر تشتري ملابس العيد لأولادك وعيدوا باللبس القديم ؟
مش لاقى شقه وساكن عند اهل زوجتك ؟
.
جالك كورونا من أيه؟
و اخذ قرض وش عارف تسدد والشغل واقف ؟
قدمت علي منحه العماله الغير منتظمه.والرد جالك انك رجل اعمال وفوق خط الفقر ؟
جتلك فاتورة كهرباء و ما قدرتش تسدد ففصلوا عنك الكهرباء؟
حاسس إنك غريب ببلدك؟
الدنيا ملخبطه حواليك و مخك بطل يجمع من كثر القوانين الجديده والقديمه ؟
رفع اﻻسعار مش عاجبك ؟
شاعر إنه في ثروات و مش مستفيد منها ؟
جالك كورونا من أيه؟
.
من النواب و ﻻ الحكومه و ﻻ اﻻعلام الفاسد ؟
ع المعاش و معاشك مش مكفي إبجار بيتك؟
بتاخد معاش كرامه 400ج وقطعوه بحجه ان عندك عرببه كارو؟
جالك فشل كلوى من المياه الملوثه و رحت تغسل قالولك ما فيش مكان إنتظر إما حد يموت و أدخل مكانه؟
ولا محتاج نقل كليه وقالواك ياتدفع ياتموت؟
بتتفرج علي باسم يوسف.
ولا معتز مطر اللي خلانا كلنا مش وطنيين وهو الوحيد اللي وطني ؟
مرتضى منصور معاه سى دى لحضرتك وخايف يفضحك بيه ؟
شوفت حاجه لرامز مجنون رسمي وخايف يعمل فيك مقلب ؟
.
جالك كورونا من أيه؟
الدولار اغتصب الجنيه بتاعكم؟
نفسك فى السمك و الكيلو وصل 50 جنيه قولت تعديها فول ؟
روحت تشترى لحمه لقيت الكيلو ب130 جنيه رجعت ب 2كيلو بطاطس ؟
جيت تشترى أرز و لقيت الكيلو ب 8 جنيه ؟
روحت تجيب التموين و قالولك اتشلت من التموين علشان عندك قيراطين طين ؟
.
جالك كورونا من أيه؟
جالك فاتورة غاز ب250 جنيه وماعندكشي اساسا بوتجاز ؟
جالك فاتورة مياه ب200 جنيه والمياه بتيجي في اليوم ساعتين ؟
مركب خط نت ب 150 جنيه و النت دايما فاصل وشركه وي تقولك يا الدفع ياالرفع ؟
نفسك فى التين و مش قادر تشتريه وبتقضيها جمييز ؟
نفسك في البطيخ وممعكشي تجيبه.ولما اتوفر معاك تمن البطيخه جبتها لقيتها قرعه؟
المشمش نزل السوق و خلص و انت ما سمعتش عنه ؟
.
جالك كورونا من أيه؟
حماتك معكننه عليك ومخليا حياتك زي .الز….. فت ؟
إخواتك مش بيزوروك وفيه بينكم خلافات بسبب الميراث اللي ابوك اساسا مكنشي حيلته حاجه ؟
واحده كنت بتحبها و عملتلك بلوك ع الواتس علشان مبعتش كارت شحن ؟
تعليمكم بقا ابحاث واون لاين وفرييييي ؟
عسكري في الجيش وسيبت امك وابوك وروحت تدافع عن وطنك اغتالك الإرهاب ورجعت لابوك ملفوف في علم مصر 🇪🇬؟
.
جالك كورونا من أيه؟
عايز تقولى إنك عندك شعور وإحساس ؟
روح الله يرحمك …………
جالك كورونا من أيه….
اسماعيل شتا شمس