سفير السلام والامل العالمي/ سمير عبده بخيت
عبد الناصر العملاق
حيفضل اسطورة
علي مر التاريخ
واقول للاقزام
====
تنبح الكلاب و سيظل
ناصر زعيم لايموت
في الفترة اللي فاتت حصل موقفين
أول موقف كان في حوار مع وزير الموارد المائية عن سد النهضة وسأله عمرو أديب طب لو حصل ملأ من إثيوبيا من جانب واحد غصب عننا هيحصل ايه قاله الوزير عندنا بحيرة ناصر اللي فيها مياه تؤمن احتياجات مصر المائية 4 سنين و إن البحيرة دي مع السد العالي حفظوا مصر من الجفاف اللي ضرب الحبشة من سنة 79 إلى 87
الموقف التاني كان من كام يوم لما الدكتور جمال شيحة قال إن مصر تمتلك بنية تحتية من المستشفيات و المراكز الصحية و إن كل مركز في مصر فيه مستشفى صدر و مستشفى حميات و ده من أيام الرئيس جمال عبد الناصر!
ده طبعا غير جيش الشركات و المؤسسات اللي بتتباع من 20 سنة و لسه مخلصش
فصعب عليا اوي نكون عايشين في خير الراجل من وقتها لحد النهاردة و الاقي الأخ نجيب ساويرس عامل حفلة عليه في تويتر
أنا بس عايز اقول للأخ ساويرس إن الرئيس جمال عبد الناصر مش مجرد رئيس و دي الحاجة اللي البعض مش قادر يفهمها ناصر نظرية سياسية كاملة آمنت بها شعوب عربية و افريقية و آسيوية و أوروبية كانت بتبص لمصر على إنها قوى عظمى
نظرية خلت دولة زي كوريا الجنوبية في بدايتها تقول احنا مش هنخترع احنا هنشوف جمال عبد الناصر عمل ايه و هنعمل زيه بالضبط ناصر اللي كتير من دول حوض النيل حفظت له الجميل و رفضت توقع على اتفاقية عنتيبي احتراما ليه
الزعيم اللي صورته متعلقة في قصر رئاسي خارج الحدود و له تمثال أو شارع بإسمه في كل بلد عربي و افريقي و ده يا باشمهندس نجيب بيسموه بلغة اليوم قوة ناعمة و حضرتك عارف طبعا الدول بتدفع قد ايه في قوتها الناعمة
سيبك من كل ده و قول إن ناصر كان راجل كان دكر و النكسة اللي بتعيطوا عليها دي الناس طلعت بعد منها تهتف لعبد الناصر و ترفض تنحيه عن الحكم
عارف ليه…
لأنه عاش للغلابة و اشتغل علشان الغلابة شاف الشعب عايز ايه و محتاج ايه و عمله كان بيفكر في الغلابة مش في عياله و لا في بيته و لا ساب لأسرته غير السيرة فقط مخدش حاجة في جيبه يعني
عبد الناصر اللي حقق في 15 سنة أحلام ملايين كانت أغلبها وقتها معجزات مش أحلام التعليم المجاني العلاج المجاني الحياة الكريمة الثقافة و الحضارة و الفن و العلوم و الابداع و كل دول مشكلتهم إن الناس بتعاملهم زي الصحة مش هيحسوا بقيمتها إلا لما تروح
عارف يا باشمهندس نجيب عبد الناصر لما كان عنده 34 سنة كان ضابط صغير في الجيش و رغم كده قدر يغير نظام حكم كامل واجه 3 دول في حرب قوية و عنيفة منهم دولتين يعتبروا قوى عظمى وقتها واجههم علشان يأمم قناة السويس و يقدر يبنى السد العالي بإيرادها و قدر
ممكن حضرتك تقولنا و أنت عندك 34 سنة عملت ايه بالضبط؟
بلاش حضرتك قبل موينيل اللي خدتها في علامة استفهام كبيرة كانت ايه حيثيات سيادتك في البلد اخترعت ايه يعني طورت ايه مثلا أي حاجة
عبد الناصر في سن 34 سنة تحمل مسئولية 15 مليون بني آدم حضرتك في أزمة كورونا صرخت و قولت مش هتقدر تتحمل مسئولية 30 ولا 40 ألف موظف عندك
عبد الناصر في سن 34 سنة تقدم و تحمل مسئولية منصب رئيس الوزراء ثم رئيس الجمهورية حضرتك على ما أتذكر في حكومة الببلاوي اتطلب منك تتحمل مسئولية منصب محافظ القاهرة طالما عندك رؤية و برنس كده و فاهم سياسية
بس للأسف جبت ورا و قلبت الموضوع و قولت إنك بتاع هلس ماتنفعش في المناصب دي
عبد الناصر لما نيلسون مانديلا اتسجن و سمع إنه أمم قناة السويس قال إن الأمل رجع له تاني في سجنه أما حضرتك لما بتتكلم بنفقد الأمل في العيشة و اللي عايشينها
عبد الناصر اتاخدت منه سيناء بتواطؤ دولي و خيانة اقليمية و دولية ضخمة لأنه كان خلاص بدأ يشكل خطر على كل قوى الاستعمار
و رغم كده الناس تاني يوم قالت له مش هتمشي
أما حضرتك أسست حزب المصريين الأحرار وصرفت عليه نص مليار جنيه و في الآخر اتاخد منك يا بورم
بس الفارق إن الناس في المصريين الأحرار كسرت وراك قلل كتييير و قالت ياللا في ستين …..
يعني بتتكلم على راجل واجه قوى استعمارية و إنت اساسا فشلت في مواجهة أمين شرطة
عبد الناصر اللي وزع الرقعة الزراعية كان بيفشخ أي حد يقرب منها بالعكس الفلاحين كانوا شايلين الأرض في عينيهم , معرفناش التبوير و البناء على الزراعة ده إلا في الأيام السودة اللي شوفنا حضرتك فيها
عبد الناصر عذب المعتقلين في المعتقلات علشان مايقتلوش في اخواتنا ضباط و جنود الجيش و الشرطة و زي ما حضرتك شايف ادينا بنعيش نتائج حرية الاشكال دي لمدة سنتين بس
بس بصراحة الاشكال اللي انت بتتكلم عنها دي جدعان و لبسوك زي الشاطر قضية الضرائب المتأخرة و معرفتش تفلت منها و دفعت الـ 6 مليار اللي عليك زي الباشا
الخلاصة في الموضوع ده حاجتين
أول حاجة اللي مش عارف إن عبد الناصر هو أبو الدولة المصرية الحالية يسكت
إحنا بندفع ثمن سياسات داخلية سيئة جدا في عهدي الرئيسين السادات و مبارك سياسات أدت لوعي زائف و تغييب شعبي و اغراق الشعب في المفاسد كدابين الزفة اللي كانوا حواليهم للأسف اقنعوهم بتبني شتم عبد الناصر و اهانته و كان في ما يشبه الضوء الأخضر لكل الكلام ده و أنا آسف إني أقول إن كدابين الزفة دول كانوا شغالين مع الرئيس ناصر و ليهم امتداد حالي شغال في عهد الرئيس السيسي
ثاني حاجة احنا محتاجين لقانون يجرم الاساءة لعبد الناصر ناصر زيه زي نابليون بونابرت في فرنسا و زي اتاتورك في تركيا و زي ستالين و لينين في روسيا و لا يستحق الاساءة المتكررة اللي بتحصل بسبب و بدون سبب
و عايزين نقول لكل اللي بيشتموا ناصر خيره عليكم و على أهاليكم ابقوا ادفعوا ثمن اللي عمله الأول و بعدين اشتموا فيه مايبقاش من راسك لرجليك خير من الراجل و تشتم فيه كده
و علشان ترتاحوا ناصر مش رئيس عادي ناصر مش هيموت هيفضل عايش كده و قالقكم في حياتكم و حارمكم من المنام ناصر مش بيموت
