متابعه : محمد سعيد عماره
حقائق علمية كتير أثبتت إن الصيام صحي ومفيد جداً للجسم، وكتير مننا بيستغل فرصة شهر رمضان الكريم في إنه يظبط فورمة جسمه ويخس ويطير الكرش، لكن للأسف، مع العادات الغذائية اللي بنتبعها كمصريين في رمضان، وخصوصاً في الوجبات الرئيسية اللي هي السحور والفطار، كل أحلامنا بجسم رشيق ووزن خفيف بتطير في الهوا مع أول وقفة على الميزان بعد بداية رمضان.
وفي العادة دايماً، وكنوع من التقاليد، رمضان ليه خصوصة في نوعيات الأكل والشرب اللي بناكلها أو بنشربها، لكن كتير منها بيكون سبب في زيادة الوزن، والخمول.
أهم النقط للحفاظ على أوزان أجسامنا خلال الشهر الفضيل:
1 – أول حاجه مهمة جدًا لازم ناخد بالنا منها، هي تجنب النوم بعد الفطار أو السحور، أو عموماً بعد الأكل مباشرةً.
2 – نحاول دايماً نعود نفسنا إننا نمضغ الأكل ببطء.
3 – بلاش أكل مقلي، أو مالح زياده أوالوجبات السريعة.
4 – حاول ماتشربش قهوة أو شاي أسود، وممكن تشرب بدلهم أي أعشاب، لإن الشاي بيأثر على عملية الهضم وبيصعبها.
5 – ابدأ فطارك دايمًا بـ 3 تمرات، وكوبايتين ماء، مع طبق سلطة خضرة أو خضراوات مسلوقة.
6 – حاول توزع وجبة الفطار وخليه على 3 أو 4 وجبات متفرقة خلال المدة ما بين المغرب والفجر.
7 – لازم نمارس تمارين رياضية أو على أقل تقدير المشي.
8 – اشرب ماء بانتظام وخليها بديل دايمًا لأي مشروبات غازيّة أو مشروبات سكريّة.
9 – في وجبة السحور، كل زبادي خالي الدسم، وطبق فول بدون زيت، مع سلطة خضار وثمرة فاكهة.
10 – قلل على قد ما تقدر من كمية الزيت اللي بتحطها على السلطات.
11 – الغي تمامًا أي مقبلات فيها كربوهيدرات.