(((سيجارة حشيش)))
طب إيه كان يحصل يعني
لو عشنا الماضي فـ بكرة
و اليوم عشناه الأمس
لو كان اليوم يتشقلب
و فـ ليلنا نشوف الشمس
لو إن حواسي الخمس
بقوا سته و تسعه و عشرة
لو إن خبر في النشرة
بيقول الحال اتغير
و كبيرنا هيبقي صغير
و الدنيا إتقلبت عكس
و القطر خلاص بقي تاكس
و النيل من بكرة يروح
لحظة ما أضرب له كلاكس
و العالم بقي لغه واحدة
و اللغة بإشارة فاكس
سمعت في ناس بيقول
صرح مصدر مسؤول
بإن الكون من بكرة
هـ يصيبه كسل و خمول
و الناس فرحانة بترقص
بتقول هو إحنا نطول
و إن إحنا فـ كون بيدور
بين ودن و قرنين تور
في جريدة بكرة الصادرة
بتاريخ إبريل الماضي
قريت فـ السطر الفاضي
إن شعوبنا العربية
إخترعت قال طيارة
تقدر توصل للنمله
لو دبت يوم ف الحارة
و البحث العلمي إتقدم
و الفيل إتجوز فارة
و السد العالي بتعنا
شغلناه خلاص بحجارة
و الجيش العربي إتطور
قاعد مستني إشارة
و هيقطع راس أمريكا
و هيعمل مليون غارة
و البحر الأحمر قرر
هيعبي الموج في شكارة
إعذرني يا صاحبي بهيس
أنا لسه ضارب لي سجارة
بقلم :الشاعر حسين