بقلم : عماد الدين العيطة
•• عقدة الخواجة لبستنا الزنط والعربى إتشال وإتحط .. البنت قالت لعمتها طنط .. والعربى اللى إسمه مايكل نده على خاله بأنكل والراجل بقى مان وبقينا ف توهااان .. الولد بقى بوى لبس كاوبوى عوج لسانه .. وتنصحه يقفل ودانه .. كاره جيرانه بينكر طينه وغير عجينه نسى دينه ولو سألته عن ديانته يبص ف بطاقته .. ولو لاحظ إنك لاقطه يقولك كابتشينو .. وأهو اى رد يرده .. يارب داهية تصده لحد مايرجع له عقله
•• عقدة الخواجة نستنا أسامينا وأعيادنا وأهالينا وكتبنا فى أول السطر عيد ميلادى قبل عيد الفطر ولمعة فلانتاين هى اللى بتميز شخصية أفندينا ، وأمان ربى أمان جبتلك م الورد بستان وعارف إنك جعان ماهو الورد أحسن بكتير م الجبنة وم الفطير .. صحيح هيجمعنا الحصير وترجع لنا لمتنا لكن كلام الناس كتير والناس تقول إشمعنى .. والورد له معنى هو اللى هيجمعنا ويرجع أسامينا