نماذج مُشرفه…فى الصوره ده المستشار أحمد_حامد ابن محافظة المنيا ، رئيس نيابة أكتوبر

المنيا /ماريانا مختار
عرض عليه محضر إتجار في مواد مخدرة هيروين للتحقيق فيه والمتهم سائق تاكسي المحضر كان متقفل ميري وملكي، وما يخرش المية
سواق اتمسك معاه هروين، واللي مسكه رائد شرطة في الطريق وهو بالمناسبة شغال في ادارة الطرق والمنافذ بالجيزة
السواق شكله كان باين انه ما يعرفش الفرق بين الهيروين وبودرة العفريت، فما كان من رئيس النيابة الا انه مسك الخيط من أوله وفضل يضيق الخناق علي الشهود ثم ضابط الشرطة وازاي كان ماشي في الطريق وأخد باله ان السواق اللي في العربية اللي جنبه مخبي تذاكر هيروين
ومن هنا لهنا اتضحت الرؤيه
السواق بيشتغل علي عربية تبع مدرسة، بيجيب الأولاد من بيوتهم للمدرسة ويرجعهم تاني، وهو في طريقه، الباشا رائد الشرطة صعب عليه انه يقفل عليه الطريق، فدخل عليه ووقفه وهات رخصك وطراخ طراخ انت ما تعرفش انا مين .. انا هوديك في داهية ..وهلبسك قضية مخدرات وسحبه علي قسم اول اكتوبر .. وفي القسم المحضر اتعمل وصاية ما فيهوش غلطة علشان النيابة تحوله للمحكمة علي طول
لكن ارادة ربنا ان الموضوع يروح عند الراجل المحترم ده .. اللي ما اهتمش بالمحضر ولا اهتم بان اللي قصاده رائد شرطة يعرف بهوات وبشوات .. هو نفذ اللي بيمليه عليه ضميره
اجري تحقيقا جنائيا عادلا لاثبات الاتهام او نفيه وتكشف له من خلال التحقيق بعد سؤال محرر الواقعة والشهود ان القضية ملفقة وان الضابط رائد شرطة قام بتلفيقها للسائق لمشادة طريق بينهما فأمر بصرف السائق من سراي النيابة مش بس كده وجه للضابط حبة تهم محترمين وحبس الضابط اربعة ايام عن وقائع حيازة هيروين وتزوير محرر رسمي واستعماله فيما زور من اجله
تحية_للشرفاء …تحية للمحترم …انت شرف وفخر للنيابة ولاسرتك ولمصر كلها
رئيس النيابة – اللي أنا ما اعرفوش شخصيا بالمناسبة – نموذج لناس كتيرة محترمة، ممكن لا قدر الله كان يجراله حاجة في الانتخابات وتلاقي خروف يطلع يشتمه ويقول “احسن عقبال بقية القضاة”