نصائح مهمة لكل ابنائنا وبناتنا المقبلين على الزواج واختيار شريك الحياة

البحر الأحمر : حنان عبدالله

طبعا من قبل ما اسرد في كلام وصفات ممكن يراها البعض نموذجي او خيالي دي كلها شويه حاجات خدوا بالكم منها اكيد مش هتكون كلها متوفره في شخص واحد لكن علي الاقل بعضها يكون موجود ويكون مرضي ليك او ليكي
– اختاروا الشخص اللي اولا يكون ليه علاقه حلوه بربنا ماتختاروش حد بعيد عن ربنا وتقولوا هنغيره
– اختاروا الشخص اللي بيحب يعرف كل حاجه بتحبوها علشان يجبهالكم ويفجأكم بيها
– اختاروا الشخص اللي يهتم بكل تفاصيلكم وتفاصيلكم انتوا بس مش تفاصيل الناس كلها
– اختاروا الشخص اللي مهما كان مشغول بيعرف ياخد من وقته ويكلمكم يتطمن عليكم انكم بخير وانكم لو محتاجين حاجه حتي في عز زنقته هيعملهالكم لو ظروفه تسمح
– اختاروا الشخص اللي معندهوش زهايمر يفتكر كل تفاصيل علاقتكم عيد ميلادكم عيد الحب امتي اول مره قولتوا لبعض كلمه بحبك مش لازم الهدايا الغاليه لو حاجه بسيطه وفاكر المناسبه احلي بكتير بس اهتموا بتقديمها وتغليفها دا مهم وبيسيب انطباع حلو عن اللي بتقدمله الهديه
– اختاروا الشخص اللي يسهر للصبح علشان يطمن عليكم لو راجعين من السفر مش يسيبكم وينام ومش فارقين معاه سلامتكم
– اختاروا اللي يخاف عليكم ويقلق عليكم ولو تعبانين يحس انه هو اللي تعبان مش انتوا اللي يجري ويجبلكم الدوا اللي يسهر علشان يديكوا الدوا اللي يظبط المنبه ويصحي من عز نومه علشان يطمن ويديكوا الدوا في ميعاده
– اختاروا اللي عايز يتمرمط علشانكوا اللي بيكافح علشان تبنوا انتوا الاتنين البيت مع بعض وتحققوا كل اللي نفسكم فيه مش اللي يرمي مسؤليه علي التاني وعايزه يعمل كل حاجه
– اختاروا اللي شاريكوا ونفسه يسعدكم بكل الطرق الممكنه مش اللي معاه فلوس كتير وبابي ومامي بيصرفوا عليه علشان اللي بيجي بالساهل بيروح بالساهل من الاخر اختاري اللي يبني نفسه بنفسه
وانت متختارش فاتنه الجمال المتكبره المغروره ماتنفعش تكون زوجه علشان ببساطه نفسها اهم من اي حاجه تاني
– اختاروا اللي يحس انه اهلكم هو اهله ويحبهم ويشيلهم فوق راسه طول الوقت ويكبر بيكم وسط اهاليكم ومايحسش انه غريب وسطيكم
– اختاروا اللي يشاركم في كل امور الحياه راجل يساعد مراته في امور البيت وقته اجازته وقت مرض مراته وقت سفرها وست تنزل وتشتغل وتساعد في مصاريف بيتها وتذاكر لعيالها وكل ده بيعملوه بحب مش بيعملوه بتذمر وانا كان مالي ومال الجواز ماكنت في بيتنا مرتاح
– اختاروا اللي تحسوا انكم عنده رقم ١ حتي قبله هو شخصيا وانكم مش زيكم زي باقي الناس
– اتضايقوا من بعض شويه اختلفوا في وجهات النظر اعملوا اي حاجه لكن اوعوا حد يغلط في التاني او احترامكم لبعض يقل مهما حصل علشان اللي بيتكسر مش بيتصلح
– حاجه مهمه بلاش تصرفوا دم قلبكم ليله الفرح في قاعه في الفندق الفلاني وفرح يكلف كتير قوي وتطلعوا مديونين انتوا الاتنين عمركم كله اختاروا حاجه حلوه ومناسبه ومعقوله بلاش بذخ علشان في الاخر الناس بتفتكر اني الاكل مكانش حلو فستان العروسه مش عارف ماله الميكب بتاع العروسه معرفش ايه البدله بتاعت العريس مش الماركه الفلانيه
سافروا بعد الفرح مكان يكون مريح ليكم وعلي قدا امكانياتكم
– بلاش تقوليله عايزه شبكه نوعها كذا بالسعر كذا ونسافر نقضي شهر العسل في جزر المالديف واحلي بلاد العالم هو اكيد نفسه في كده كمان وهيحاول يجيبلك احلي حاجه بس علي قدا امكانياته مش علي قد امكانيات جوز صاحبتك الفلانيه المليونير اللي واخد فلوس من باباه علشان هو راجل عصامي ميحبش يقول حتي لاهله عايز فلوس ولا اللي عايش بره وبياخد مرتب ٢٠ ضعف اللي بياخده خطيبك او جوزك مالم يكن بخيل دي حاجه تانيه
– بلاش تقارن بينها وبين غيرها لو بتحبها صح هتحبها بكل مافيها وهتبقي هي اجمل واحده في الدنيا بالنسبالك
اخيرا كل حاجه سواء جمال او غني بيروح مع الوقت بتبقي الروح والسند الحقيقي وبس بيبقي اللي يستحملك وقت مرضك ويصحي من عز نومه علشانك علشان يديك الدوا بتبقي الروح الحلوه بيبقي العشق بيبقي اللي يدي بمحبه وهمه يسعدك ويفرحك ويطمن عليك
وأخيرا اختاروا من عائلات محترمة علشان اذا حصل خلافات لا قدر الله تلاقوا اللى يقف جنبكم ويحل مشاكلكم مش اللى يشعللها نار ويحاول يطلع كسبان ويفرق بينكم لانكم فى الآخر انتم الاتنين خسرانين اذا حصل انفصال لا قدر الله
وحياة سعيدة ان شاء الله .