متابع / مهدي عبدالسلام
كتب الاستاذ نور الحريري
عن قائمة جهاز عروسة
فقال :::: دي قايمة رفايع منزلاها عروسة وكاتبة تحتها مبلغ وقدره وهى في قمة فخرها وسعادتها إنها قدرت تحقق الإنجاز دا وتخرج من بيت أبوها وهى جايبة أعلى جهاز في منطقتها! مش مهم بقا أبوها جاب الفلوس منين وجابها فعلاً ولا لسة هيعيش اللي فاضل من عمره في ضغط وقلق لحد مايسددهم مش مهم المهم إن أتجوز وأنا مش ناقصني حاجة سواء محتاجة الحاجة دي ولا لأ المهم الناس يشوفوا ويتفرجوا.. ليه ياجماعة حقيقي ليه! والله العظيم مافي بيت مهما كان مستواه المادي والاجتماعي محتاج أكتر من بوتجاز وتلاجة وغسالة وطقمين تلاتة تقديم! والله مافي عروسة أو عريس محتاجين أكتر من تلت أربع فوط كل واحد فيهم مش 135! ليه الجهل والتخلف وقلة العقل دا ياجماعة إنتوا بتعلوا على بعض في إيه! إنتوا بتبدأوا حياتكوا بالجواز مش بتنهوها عنده! انتوا لسة قدامكوا حاجات كتير مفروض تعملوها مع بعض بعيد عن هم ومشاكل الأقساط! ارحموا أهلكوا شوية إحنا في ظروف مهببة مايعلم بيها إلا ربنا! متبدأوش حياتكوا بإنكوا تعملوا في أهلكوا كدا! معظم البيوت اللي قايمة من زمان لحد دلوقتي كلها بدأت بأبسط الأشياء ومسمعناش عن حد من أهلنا داين نفسه بديون زي دي عشان يتجوز ويبدأ حياته! كلهم اتجوزوا بحاجات بسيطة جداً ومع الوقت بدأوا يحسنوا من ظروفهم وهما مع بعض من غير مايشيلوا هم ولا يشيلوا همهم لحد! أنا مبقولش اعملوا زي حد غريب عنكوا متعرفهوش! انتوا هتعملوا زي أهلكوا أحسن الناس في نظركم واللي ربوكم لحد ماوصلتوا للي انتوا فيه دا! ردوا جميلهم عليكوا بإنكوا متشيلهمش أكتر من طاقتهم في ظروف زي دي خصوصاً لو كان عندكوا اخوات ومحتاجين زيكوا هما كمان!
