صفحة في حياة بنوتة 

كتب :محمد عرابي

سألتني البنوتة الجامعية أحس الوحدة والفراغ أنصحني نصيحة تخرجني من هذا الهم -قلت لها عليكي بالقراءة ثم امسكي ورقة وقلم وأخرجي ما بداخلك وكان هذا ما كتبت .
مش أول مرة اكتب علي الورق حاولت اكتب قبل كدا بس مكنش عندي رغبة حاولت اكتب علشان بدور علي اي حاجة وخلاص ومكنتش حاسة بحاجة ناحيه الكتابة خالص بس في يوم إلهمني شخص وبدأت اكتب وفعلا حسيت احساس جميل ورغبة حلوة جدا حاسة اني كنت تايهة ولقيت اللي كنت بدور عليه بقالي كتير في الناس وملقتهوش لما كان حد من أصحابي بيسمعني دايمآ بكون غلطانة وفاكرة انهم هيحسو بيا زي فعلا بس بيكون العكس بيسمعوني علشان بيكون عندهم فضول او عشان يقضوا واجب الصداقة مش اكتر محدش حاول في اللي حواليا يفهمني فعلا ويحس بلي جوايا ملقتش حرفيآ حد جنبي عشاني انا مش عشان حاجة معينة زي مثلا اني دايمآ بضحك كتير وبحب الهزار ودمي خفيف وبكسب اصحاب كتير من دة واني بتعامل بطبعي ومش بتصنع بعتبرهم أخواتي بس وقت الجد مش بلاقي حد جنبي حرفيآ ….قررت اكتب وواثقة ان الورق هيسمعني ويحس بيا كمان مجرد ما مسكت القلم حسيت اني دخلت عالم تاني عالم انا بصنعه بقلمي مرتاحه فية وهو حاسس بيا جدآ ،حاولت اتعامل مع كل حاجة ببساطة الورق الذي إلهمني الفكرة دي وحكيت مع امي وبدأت اكلمها بكل بساطة ان انا كبرت واني اقدر اعتمد علي نفسي واني حاسة بيها وعارفة قد ايه هي بتعاني من جواها وان احنا مسؤلية عليها خصوصآ ان احنا اربعه وتعتبر امي شايلة البيت علي اكتفها وبابا بيعيش عشان يأكلنا بس قررت اكون ليها زي الورق بالنسبة ليا قررت اسمعها واحس بيها واشيل عنها شوية من الحمل بما ان امي مش بتعرف تكتب مش هتحس برغبة الكتابة وانها ترتاح زي ما حصل معايا ….تاني يوم لقيتها بتصحيني وتقولي ..عاوزة احكي معاكي قمت وانا مبسوطة وقعدت اسمعها وهي تحكي وبعد كدا اخدت حضن جميل وكنت مبسوطة …جميل ان الانسان يلاقي نفسه مع شخص او حاجة مش لازم أنسان ممكن يكون ورق أو مزيكا او رقصة المهم انه يلاقي نفسة وبس #