بقلم : مالك ربيع
س _سرحان كدا ليه؟
ج _انا مش سرحان
انا بس بحاول مزعلشي
بس انا زعلان
س _طب ليه سرحان؟
ج _علشان مبكيش
طول عمري بحاول إني أعيش
وحلفت على الأحزان متجيش
بس بتيجي
س_طب أسمك أيه ؟
ج _الأسم مفيش
س_طب عمرك كام ؟
ج _لأ مش فاكر
تقريبا فوق الثلاثين
س _طب ساكن فين؟
ج _فى اول شارع التايهين
س _طب رايح فين؟
ج _راجع لنفسي
س _وهترجع ليه ؟
ج _علشان حبى
س _طب لو حبك فاتك ؟
والوضع هناك ميطمنشي
هتقول ايه
فاتنى ازاى هو انت عبيط
ده انا ماسك ومتبت في الخيط
والخيط لو داب يبقى انا ميت
طب اقولك
هسأل انا وانت جاوبنى
س _انا هعمل ايه وياه ؟
ج _الأحسن إنك تنساه
وتعيش أيامك من غيره
س _انساه أزاي ؟
وانا اصلا كنت ف يوم خيره
وهتعمل ايه؟
ج_ مش عارف
بس مش هعرف أكمل من غيره
س _والحل ياصاحبي؟
ج _الحل بسيط
س _طب قولى عليه
اقولك ايه وانا اصلا مش عارف
طب أهدا ياصاحبي
س _اجيبلك شاي
ج _لأ هات القهوه عشان مخنوق
وتكون ساده
ولا أقولك مش عايز افوق
س _طب انت اساسا شغال ايه
ج _شغال على نفسي بقالى يومين عشان تعبان
طب اقولك حاجه
غور يلا سلام
س_رايح على فين
ج _انا رايح أنام
يمكن انام كده مصحاشى
دلوقتي الجاى أقل من الماشى
يمكن دورى أو دور مين متدراشى