فَكِة مية
ورقة وفَكة بَعد مَشقة
العُملة دي سَكة حِلمنا نشوفها
زي جنيه مكة
هو ريال يعني ده مال
أما جنيهنا يا خال
الورقة منه بكام
سألت عمي حلال
رد عليا وقال
حِلمت أشوفها بعنيا
أفكها وتعدها إيديا
أعد والحن بصوت العَد
وأغنيلها أحلى أغنية
المية حلال ولا ألف مع الحراميه
حلم بقى حقيقة
دعوة إستجابها ربي في دقيقة
عُملة ورقية
كل المصالح مَقدية
اليوم حلال أصبح أفندي من الأفندية
طيبة قلبى وحسن النية
الورقة ف جيبى
البنك نسيبى
والغنى بقى قريبى
والفلوس هاتظهر عيبى
والنفوس هاتتغير ماالكل بقى حبيبى
الكل بيحلم بحته بعَشرة
و معايا ميه
وإسمى هاتسمعوه ف النشرة
الفقر يا صاحبى
أصيل بيصون العِشرة
انا عاين الورقة ف حِتة حِشرة
تسع عشرات وعشرة
دول ميه ميه
أنا أحب مال
أنا الجمال
سِد الرجال
أنا اليمين ال جنب الشِمال
انا شارى حاجتى م البقال
وحاجة العيال
وخاتم كمان ومعاه خلخال
انا ها رَوق
والبس وأتذوق
بعد الميه
للمليون أنا مِتشوق
الميه مع الطمع
عمرها ماتحَوق
أول مرة أشوفها
كان كسوفى أكتر من كسوفها
خلاتني أتغير وأقول ع البلكونة شُرفه
ووأقول ع المَيه كارفه
وأشربها مَعدنية
أصل الكِبر حِرفة
شوفتوا الفقر كان بطل لمسلسل من مِيه حلقة
الجنية المصرى مات من الخنقة
لا قادر يشترى فرخة ولا حتي مَرقة
الميه أكيد ها تُفك زنقه
ورقة واحدة أفكها تاني ؟
وتخلص وأبقى أنا الجانى
بلح الشام وعنب اليمن ياما إترجاني
والتاريخ شاهد
لما الجنية جانى
كنا بنرضى بيه
وبنحلم يكون ين يبانى
إيه بيدوم
جنيهنا اليوم بقي قِرش
والقرش أساسه كان سودانى
والِنكلة راحت وإرتاحت ومش جايه تاني
الخديوي والخليفة وسِتة معاهم ببدلة قطيفة
وإيد خفيفة وحِتة بتعريفة
لاقينا المَحفظة نظيفة
من يومها وحلمي مِيه
مِية صحيحة وأنظر لِها نظرة
الاقيها حاسة الاقيها عَازرة
الميه زى البصرة
خلتنى ف ثانية ف نصرة
سويسرا اليوم ف حسرة
أصل مش عارفة مكانى
البورصة باعته وعزمانى
بس أنا مليش ف الضانى
والدولار مش عارف أنا شكله
مش أى حَد يقدر ياكله
انا باكل ع قد بقى وإسنانى
حلال راجع يا زماني
أجيب بنكلة حمص وبقرش سودانى
هو الخواجة بكام إشترانى ؟
والبنك حرقنى وكوانى
هو الجنية الورق يقدر يتكلم عن الدهب تانى ؟
كان جنية وذهب
وذهب وعمره مانادانى
عُمرى ما أفك الميه تانى
الميه مكانها أحضانى
الفقر بيتمنى أحزانى
هو المُر بيرجع عسل تاني ؟
البصل والتوم جه وعزانى
بيقولو إنسى الى حصل
الجنيه خلانا فاكهه خلانا ضانى
عزاكم مقبول
نسيتوا تجيبوا الفول
يشهد ويقول مِن غلاه وضيع كيانى
أنا لو شوفته
هامشى من شارع تانى
العيب مش عليه
العيب ع الفقر الى ف يوم عصانى
المِيه لو اتفكت
مش هاترجع مِيه تانى
والعُملة لو سَكِت
ياريتها ما تفتح تاني
نفسي أتأكد إن الجنيه مالوش هدف تاني
يتصرف وإحنا نتحرف
ناس بتاكل نص بطن وناس عايشة بتتعلف
بالجنيه عمك حلال يعيشها نضال
وع سبيل المثال
فَكينا كام ورقة
ولا عُمرها فَاَرقة
العُملة هي البَركة
وضميرنا في كل ساعة
والرضا والقناعة
والشكر والتواضع
ياريت البَركة يبقي لِها طوابع