شعب مالوش كتالوج
بقلم – محمد فواز أحمد
مفيش ناس في الدنيا بتسكن في شقة ٢٠٠ متر وعاملين نصها صالون وسفرة عشان لما يكون في ضيوف يقولوا والله بيتهم حلو و تحفة .
مفيش شعب في الدنيا بيعمل افراح و يعزم ٦٠٠ واحد ويدفع مرتب اربع سنين عشان الناس تقول ( الله فرح اد المقام )
مفيش شعب في الدنيا الرجاله فيه بتوفر من مصروف البيت علشان الدخان بتاعهم سواء السجائر أو علي القهوة
مفيش شعب في الدنيا دي التجار و البقالين بيستنوا لما الحكومة تنزل العلاوة للموظفين و لاصحاب المعاشات و تغلي عليهم كل حاجة عمال علي بطال.
احنا شعب اعتاد العيشة بالغلط و كلنا عايشين بالغلط بخلاف طبقاتنا و اختلافتنا المادية من أول الشخص اللي ماسك ايفون وهو مرتبه ١٢٠٠ جنية و بيشتكي من الغلاء و المواء لحد ست البيت اللي بتشتكي من غلاء أسعار الخضار وهي بترمي اصلا نصه في اخر كل يوم .
احنا مش فقراء احنا بنحب المظاهر والمناظر و الخدع المكتبة .